Thá-kheh：2012阿却賞tio̍h獎人林貴龍台語小說集

序

3C ê 電腦手機出現，本是欲縮短交通ê距離，增加人kap人之間互動交流，方便求取爆炸ê智識；卻是，見面ê時間愈少，難得見面ê時，坐對面mā是各人tàm頭坐禪入魔予手機仔sńg；留tī厝內ê時間愈濟，lóng是坐tī電腦前，予電腦ê智慧軟體洗腦入迷，漸漸退化無閒去思考lán tsit塊土地ê寶藏；罕得人知影世界十大名樹，lán有兩款台灣特有種（tsíng），用台灣號名；逐國lóng有in特殊ê文化，iah lán ê國服、國花、國舞、文化、歷史，濟濟失落ê寶藏--leh？

揣回lán祖先ê寶藏，每一个人in「阿媽ê寶藏」，記錄--起來留存傳承，添加活動ê骨肉，灌入性命ê血水，補給營養ê感情入鏡小說，予讀者tī夜深人靜，心靈空虛ê閱讀中頓悟致覺吸收，kiāu起受教育掩崁ê記憶 (kì-ik)，回想重新思考，替換現代少年人激kah真無閒mā上無愛聽人se̍h-se̍h唸ê－口耳相傳。

Iah lán tsit代ê文化寶藏就藏tī〈Thá-kheh〉tsit抱「天霸王卵」（『巨蛋』）ê長篇小說，精寫lán共同生活ê土地深情，tī保守洗蕩ê年代，衝突ê族群文化，"異"國ê婚姻摩合；套電影ê廣告詞講，痴迷ê初戀文藝愛情，江湖義氣ê暴力美學，有hit个年代講「本省掛、外外省掛」烏社會êphiah話、『烏話』；正確攑箸ê教養，食西餐刀tshiám仔ê使用禮儀,lim洋酒調酒ê初步智識，無仝族群ê生存kap飲食文化ê落差...

小說ê人物角色，對小學三年寫到六十歲，自然呈現各人物in人生過程中所使用ê語言；人生如戲，小說ê情節有真有假，寫實？寫虛？男主角Thá-kheh有幾分作者ê形影？請看官ná看ná臆謎。Tī tsia先剖白，作者娶外省某，三十七年參悟看徹新住民ê文化意識；文中男主角生一位金紅色頭毛ê查某囝，作者ê查某囝兩个lóng是烏頭毛，m̄-koh，文中Thá-kheh kap作者个大姊、小弟，真實是一出世就是金紅色ê頭毛、目眉毛，皮膚毛。

落尾是上重要--ê，寶藏m̄-thang tī lán一代消息去，將lán祖先傳予--lán--ê，添加lán一代ê文化資產傳承--落--去，傳承需要記錄，記錄需要寫作，寫作ê心血需要逐家來做讀者，閱讀了解就是傳承，擴大傳承koh請親情朋友來閱讀，這就是俗語講--ê：「文化教育kap宣傳，永續盡心bē-sái斷（tuān）」。